మన శరీరానికి నీరు ఎంతో అవసరం. రోజువారీ జీవక్రియలు సాఫీగా సాగాలంటే సరైన మోతాదులో నీటిని తాగడం చాలా ముఖ్యం. కానీ “ఎక్కువ తాగితే ఇంకా మంచిది” అన్న భ్రమలో పడి రోజుకు 4-5 లీటర్లు, అంతకంటే ఎక్కువ నీళ్లు తాగేవాళ్ల సంఖ్య పెరుగుతోంది. వైద్య నిపుణులు మాత్రం దీన్ని “ఓవర్ హైడ్రేషన్” అని, ఇది ఆరోగ్యానికి తీవ్ర ప్రమాదం కలిగిస్తుందని హెచ్చరిస్తున్నారు.
సాధారణంగా పెద్దలకు రోజుకు 2 నుంచి 3 లీటర్ల నీరు సరిపోతుంది. వాతావరణం, శారీరక శ్రమ, వయసు ఆధారంగా ఈ మోతాదు స్వల్పంగా మారవచ్చు. కానీ దీనికంటే ఎక్కువగా తాగితే శరీరంలోని సోడియం, పొటాషియం వంటి ముఖ్యమైన లవణాలు మూత్రం ద్వారా వేగంగా కోల్పోతాయి. దీన్నే వైద్యులు “హైపోనాట్రీమియా” అంటారు – రక్తంలో సోడియం స్థాయి పడిపోవడం.
ఈ సమస్య తలెత్తగానే మొదట అలసట, మగత, తలతిరగడం, తీవ్రమైన తలనొప్పి వంటి లక్షణాలు కనిపిస్తాయి. తర్వాత శరీరంలో నీరు అధికంగా పేరుకుపోయి మెదడు కణాలు ఉబ్బడం (సెరిబ్రల్ ఎడెమా) జరిగి మూర్ఛలు, కోమా స్థితి కూడా రావచ్చు. పొటాషియం స్థాయి తగ్గితే గుండె లయ (హార్ట్ రిథమ్) దెబ్బతిని ప్రాణాంతక స్థితి కూడా ఏర్పడే ప్రమాదం ఉంది.
కిడ్నీలు కూడా ఈ అతి హైడ్రేషన్‌కు బలైపోతాయి. నీటిని ఎక్కువగా ఫిల్టర్ చేయాల్సి వస్తే వాటిపై అనవసర ఒత్తిడి పడుతుంది. దీర్ఘకాలంలో కిడ్నీ ఫంక్షన్ దెబ్బతినే అవకాశం ఉందని నెఫ్రాలజిస్టులు చెబుతున్నారు. కాబట్టి “నీరు ఎక్కువ తాగితే ఎక్కువ మంచిది” అన్న ధీమా పక్కనపెట్టి, మోతాదును గమనించడమే ఆరోగ్యానికి సురక్షిత మార్గం.
Save or share this story as a newspaper-style Epaper Clip:
